Wo sahiloo pe gaane wale kya huwe Wo kashteyyaa chalaane wale kya huwe

Kuch loug apne andar ki kaifeyaat ko zahir kar dete hain aur kuch apni har sonch, har dukh, har parishaani ko apne andar hi sehte rehte hain. Koi chotti si baat, koi mamooli sa dukh un ke dil ko youn ghair laita hai ke woh khud bhi ussay samajh nahe paate. Poochne waloo ko bata bhi nahee paate ke kis sonch ne unhain udaas kar deya hai kyonke yadain un bahut se dukhoon mein se ek aisa dukh hota hai jo "an-kaha dukh" hota hai aur jo sun'nay wale ki nazar mein nehayat aam se jabke "sehne" wale ki nazar mein nehayat khaas hote hain isleye insaan bebasi mehsoos karte huwe chup reh jaata hai.

Issi sonch ki haamil "Naasir Kazmi" ki yeh ghazal zehan per udaasi aur umeed ka ek ajeeb sa ehsaas paida karti hai, un ki is ghazal mein zindagi se mayoosi bhi hai aur zindagi ki hasrat aur tamanna bhi, raat ki tareeki ka ehsaas bhi hai aur us subha ka intezaar bhi jo apne sath nae qaafillay lane wali thee aur jo aa hi nahee chukti. Is ghazal mein Naasir Kazmi ko saahiloo per gane waloo, dosti nibhane waloo, nae imaratain banane waloo aur akele udaas gharoo mein diya jalane waloo ki yaad ati hai, un logoo ki yaad ati hai jo zameen ka bojh uthane ka azam'o'himmat rakhte hain, aap sab ki nazar hai..

Wo sahiloo pe gaane wale kya huwe
Wo kashteyyaa chalaane wale kya huwe
Wo subah aate aate reh gae kahaan
Jo qaafilay thay ane wale kya huwe
Mein un ki raah dekhta hon raat bhar
Wo roshni dikhaane wale kya huwe
Ye kaun loug hain mere idhar udhar
Wo dosti nibhaane wale kya huwe
Wo dil mein khubne wali aankhain kya huween
Wo hont muskuraane wale kya huwe
Emaarattain tu jal ke raakh ho gaeen
Emarattain banaane wale kya huwe
Akele ghar se poochti hai be-kasi
Tera diya jalaane wale kya huwe
Ye aap hum tu bojh hain zameen ka
Zameen ka bojh uthaane wale kya huwe